Ujan Bulan Januari 2009

Dalam seminggu ti udah, gaya mua ari kami di Lutong suah amat ujan. Ujan enda balat, tang suah sampai pagi ari siti. Tang saritu tadi, ujan balat amat. Nyau baka ka dibuboh ai ujan ari langit, munyi ka jako sida indai aku ma maya ujan balat. Ujan pagi tadi endang bejurut ari demalam.

Aku bisi enggau bala sama kerja ngintu pengerami parti pencen staf kami ba Grand Palace Hotel, Miri. Benong ka enjoi sempat ga aku merening keluar merati ka kilat ka manchar dilangit. Ati aku semampai irau alu jam pukul 10 malam, aku madah ka diri pulai.

Maya aku ninggal ka alai parking kerita hotel nya, ari bedau ujan. Nyau aku datai ba senentang Pujut 3, dia deh ujan naka iya pemalat! Waiper kerita ngena ka paling laju kena aku, tang enda ulih peda tanda jalai empa pemalat ujan. Aku begadai-gadai driba kerita aku niti jalai besai nuju ka Lutong. Datai ba simpang 4 Gereja Good Sheperd Lutong, dia deh simpang jalai sama ga enda ulih peda. Ni bagi parit, ni bagi jalai alun, nya enggau nasib diri milih ka betul laban kawasan nya ampoh lalu tambah ka "pasang besai".

Begagar kaki nekan ke minyak kerita takut kediri masuk parit! Ati aku balat amat irau serta berasai takut, meda jalai alun penuh laban ai. Nyau baka sungai menua nya dia. Kelama iya datai ga aku dimua pagar rumah. Apoo! Tengah laman rumah endang udah penuh ai; datai ba buku ali maya aku pansut ari kerita muka kunci pagar. Aku besampi meri terima kasih ngagai Tuhan laban aku udah selamat datai dirumah.

Ujan alu semalam-malam nyentok ka pagi tadi. Tang maya jam 8 pagi tadi dia deh ujan tak naka iya balat. Parit besai ampoh lalu ai iya meluah ngagai jalai raya. Bisi sejam setengah ujan turun, urong pukul 10 baru iya ngetu. Maya iya ka bangat amat, aku endang enda ngetu besampi minta ujan ngetu alu ngarap ka enda bah! Irau ati laban rumah kami menyanak endang semak tebing sungai Miri. Alai tu suba "the deepest area" maya bah Taun 1981. Dia kita ngira, jembatan Lutong pan nyau ka ampoh laban bah taun nya suba. Eeee... nyeregu bulu ma aku ingat ka bah taun nya suba. Nasib ga rumah los Shell alai kami menyanak diau maya nya suba enda ditiki bah. Mayoh macam utai melepong mansa rumah kami maya nya, sampai ka kami menyanak tetemu ke lesong kayu ke cukup iya pemesai tesangkat ba batang pun pinang ka tumboh ba belakang rumah kami! He..he..he.. pama amat bisi kena nutok daun ubi enggau belacan lesong nya suba. Diatu nadai agi wai! Dah buruk!

Ka diatu aku arap ka ujan tau ngetu tang enti agi ujan arap ka enda ngemalat pagi tadi. Gambar ditu diambi aku leboh maya ujan mupok ngetu.