Selamat Hari Pengada Nigel
Kena 20 Mei 2007, uchu aku Nigel ngintu hari pengada iya ka 4 tahun. Nyadi ari bulan iya ada tu sama enggau hari menua Miri di gelar Bandaraya.
Taun tu, Nigel enggau orang masuk ke nama iya dalam ngelumu pengabis maioh orang begulai berami ngintu hari pengada sida ke ada kena 20 haribulan Mei. Pengerami tu diintu bala maioh ba Dataran Kipas Miri (Miri City Fan) kena malam 19 haribulan lalu penyampau orang ke masuk ke nama sida dalam pengerami tu iya nya 211 iko.
Majlis Bandaraya Miri (MBM) pemegai rikot baru “Gerempuru Pengadis Besai Kunsi Nyambut Hari Pengada Rayat” dalam Bup Rikot Malaysia (Malaysian Book of Records) lalu ngalah ke rikot lama ke dipegai Pulau Pinang.
Kena meri terima kasih ngagai bala sida ke masuk pekit tu, Nigel bulih buah tenggak emas becampur emas burak, kupon kena meli kek, pen, baju T enggau seluar panjai ke dikena iya maia ari pengerami malam nya.
Leboh maia pengerami tu, bala artis bisi datai lalu Nigel gaga amat madah kediri bisi betemu “Auntie Artis” lalu nyebut “sida suka aku”. Senyum aku ninga cerita iya. Aku berasai gaga ati laban iya ngerami hari pengada iya dalam cara ke nyadi ke pengingat iya sampai jemah ila.
Selamat Hari Pengada nuju nuan Nigel. Nenek bersampi minta Tuhan selalu merkat nuan enggau pengelantang, pengerai serta umor panjai.
Labels: Bandaraya Miri, Pengada, Pengerami
posted by LimpyFrog @ 12:53 PM
1 Comments:
Pama endar Nigel bisi enggau org begempuru ngeram ka hari pengada neh!! Untung endar bisi bulih buah tangan laban ti bisi enggau.
Kami ditu kena ngintu hari pengada Denice mina mai kek ka sekula iya, awak ka bala anembiak bukai ba sekula iya dia bisi ampit makai kek!
Subscribe to Post Comments [Atom]
<< Home