LimpyFrogMusings

Selamat Taun Baru 2012

2012-01-01T20:45:00.000+08:00

Selamat Taun Baru 2012. Ngarap ka taun baru tu mai pengrindu serta penglantang belama-lama iya.

Selamat Ngintu Ari Natal 2011

2011-12-25T01:31:00.000+08:00

Selamat Hari Natal ngagai semua bala pemacha blog aku tu serta besampi kita sebilik bulih berkat Tuhan taun tu sampai ke taun baru 2012!

Trevor Nyambut Ari Pengada Iya ke 5 Taun

2011-12-21T19:30:00.000+08:00

Kena 20 Disember 2011 tu tadi, Trevor nyambut ari pengada iya ka 5 taun. Enda berasai nyau majak besai serta pintar enggau pandai mega tudah iya. Aku meri puji serta terima kasih ngagai Tuhan laban udah merkat iya enggau pengerai selama taun 2011 tu. Taun dulu suba, kami duai ngintu ari pengada iya di spital besai Miri laban iya kenak penyakit "dengue". Naka iya tusah serta rawan amat ati aku maya nya suba laban mikir tudah iya ga mit langkar tuboh tambah umor agi biak. Tang laban pengasih Tuhan, gerai ga iya. Taun tu kami ngintu ari pengada iya ba rumah indai aku di Piasau Phase 2. Aku endang semampai besampi minta Tuhan meruan ngibun pengidup iya belama-lama.

Happy Birthday my Little Sheriff and Nenek loves you so much!

Bersikap Ka Rumah

2011-11-18T02:50:00.000+08:00

Nadai berasai nyau udah tengan bulan sebelas diatu. Dalam dua minggu agi datai bulan dua belas. Pia mega enggau Taun Baru 2012 nyau majak semak, aku merening utai dalam rumah lalu bepikir iya nyau patut disikap. Muai "sampah" ke ditimbun aku ngelama tu, iya ke dikumbai tau dikena serta diguna dudi ari ila. Tang nadai ga nya diguna. Hmm....nadai penyadi nyau dudi ari ila nyadi "hoarder" munyi ka jako dalam program Astro. Pia mega semina tak alai sida empelawa berumah besai agi deh ah!

Berengkah dalam seminggu dua tu ngansing keh tulang besikap rumah sebedau Hari Christmas enggau Taun Baru datai.

Trevor Ngintu Ari Pengada Umor 4 Tahun DiSpital

2011-01-15T12:31:00.006+08:00

Selamat Hari Pengada Trevor Kent. Besampi Tuhan semampai merkat nuan enggau pengerai, pengrindu enggau pengelantang. Taja nuan ngintu ari pengada nuan ke 4 tahun dispital, aku meri besai terima kasih ngagai Tuhan laban meri nuan pengerai udah ke sakit tu tadi. Nenek sayang Trevor "many many".

~God ,my Father,

from You I have my being.

Be close to me and my family and hear my prayer.

Look upon us in our moments of need, for You alone can give us true peace.

May We share in the peace of Christ.

Gifts without measure flow from Your goodness to bring us peace.

Our Life is Your gift.

Guide our life's journey,

for only Your love makes us happy.

Keep us strong in Your love and give us Your Peace. Amen~

He will not let you fall; your protector is always awake. ~ Psalm 121: 3

Selamat Hari Krismas 2010 enggau Taun Baru 2011

2010-12-09T21:19:00.000+08:00

Selamat Hari Krismas Taun 2010. Arap ke semampai bulih berkat ari Allah Taala belama-lama iya.

Cerita Bejait

2010-06-10T17:38:00.010+08:00

Dalam bulan empat nyin tadi aku bisi nembu ka 3 iti “wall hanging quilts”. Nama diberi aku ka sida 3 pua tu iya nya “Our Lord’s Prayer”, “Christmas Joy” enggau “Lazy Winter Birds”.

Pua tiga iti tu digaga aku dalam taun 2003 tang aku lalu bedau bisi awak nyiap ka iya leboh mayanya suba. Tu sida udah siap, gaga amat ati aku laban bisi ga dipandang ditu.

Bansa kain kena aku tu iya nya “chinese cotton”. Kebuah aku ngena kain tu suba laban ka agi belajar ngaga corak pua lalu rega kain tu murah. Enti bisi salah gaga, enda ga ati kelalu tusah laban kain tu rega ke murah. :) Kediatu aku suah agi ngena kain “American cotton”. Bala kaban kami ke selalu begempuru ngaga pua tampong seribu sama bela ngena kain bansa tu. Dia bisi “jualan murah” lalu nurun kami sebuat ka Kuala Belait bebeli ka kain din. Mayoh agi bansa bungai ulih dipilih enti meli diKuala Belait din. Kadang-kadang minta beli bala pangan ke bisi raun ke menua Ribai ga bala kami!

Nya meh! Sampai bala sekeda belalai bebeli ka kain laban takut ditemu bala sida sulu ati! Ma bebeli ke kain enda kakang ngena belanja duit ringgit tang ma bebeli ka perengka kena besari-sari dirumah nyau bekira berapa wang ringgit ka dibelanja. Hai langgai! Endang gaya kitai indu, enti udah utainya dikedeka ati endang enda bepikir dua kali! Janji bahagia munyi ko jako bala sekeda!

Dia bisi penusah dia mega bisi pengelantang

2010-05-14T13:36:00.002+08:00

Benong ngenat ka ati ti sinu sambil ngendas ai mata maya ngintu sembiang ka orang ka mati digerija St Joseph Cathedral Miri, peda datai 5 iko bansa Cina ngetu semak alai aku duduk lalu betabi jari enggau aku leboh sida mansang nyambut sekramen. Aku gaga ati laban dibetabi tanda “Peace be with you”.

Nyau maya abis sembiang serta leboh nganti keranda dibai pansut ari gerija, kami ka bisi dia lalu bediri dimua pintu gerija sambil bejako enggau bala pangan ka lama udah enda enggau betemu. Nyadi sida ke betabi enggau aku tadi pan lalu ngetu nanya aku pasal kati asai megai pengawa nyadi “Senator”.

“Minta ampun, nama utai sebut nuan tadi?’, ko aku nanya laban enda tentu didenga utai disebut sida.

“Oh! You are the newly appointed Senator, right?”, ko sida nanya baru. “Oh! God blessed to you brothers and sisters for your kind compliment! I am a friend to the new Senator DSB and I am always mistaken for her. I guess the Senator and I must have quite a similar look”, ko aku nyaut.

“Oh! Really? That’s okay. Then this means you’ll be the next “Senator,” ko tudah Cina siko. “Hopefully, God’s willing,” ko aku nyaut iya. Paduhal sida betabi enggau aku dalam gerija ukai semina tabi “Peace be with you” tang tabi “Congratulations” mega! Akai rai! Nya iya bulih!

Berasai malu bisi ga aku paginya, berasai gaga ati bisi ga aku mayanya. Bah! Kati ko nuan Senator DSB? Tau mangku pengawa baka nuan aku? :)

Pengawa Tuhan endang enda ulih diperagam kitai. Maya kitai sinu serta tusah ati, bisi ga iya meri pengrindu enggau pengelantang awak ka penusah ka disan kitai berasai lempong lalu kitai ulih ngasai ke Pengasih Iya mega. Meri Puji ngagai Tuhan kesemua utai tu lalu pia mega besampi ka semengat menyadi dalam Kristus ka udah ninggal ka dunya tu diau lantang dalam berkat Allah Taala. Amen.

Bejait

2010-04-29T12:06:00.001+08:00

Sekumbang ari bulan sebelas 2009, aku rajin amat nembu ka sekeda pua tampong seribu ka digaga ari taun 2003 suba. Gaga ati meda bisi siti dua ka udah tau dikena alu dipandang ka ngagai bala kawan. :)

Sekeda pua ka mit agik udah diberi ka sida bala uchu aku empu alu uchu menyadi aku. Nadai gambar dipandang ditu laban enda ati nyenep leboh maya puanya tembu suba.

Diatu projek baru ka benong digaga bala gerempong kami ianya “bookself”. Lungat amat ngaga pua tu sepi aku laban beguna ka runding dalam cara-cara ngaga corak bup enggau utai bukai kedeka disimpan ba rak bup. Berasai pedis pala aku maya ngaga projek tu. Enda ulih tindok jenak ma udah mikir kati ka ngaga gambar bak baris kebaru. Nyau ka tiap malam tindok jam pukul 1 pagi. “Nya baru iya! Kerja OT tanpa gaji”, ko anak aku.

Ma projek rak bup tu udah siap, kami deka ngaga “Sunbonnets”. Bela bisi udah kala ngaga “sunbonnets” bala kami sekawan tang sekali tu kami deka ngaga baru. Pua “Sunbonnets Sue” gaga aku suba diberi aku ka anak menyadi aku, Daphne. Nadai ngambi gambar pua tu suba nya alai nadai dipandang aku ditu. Projek kedulu agi gaga kami ianya “Baltimore Album”, “Autumn Leaves” enggau Thanksgiving”.Maya aku ngaga pua "baltimore album, autumn leaves enggau thanksgiving"suba, aku agi belajar milih kaler ti betul enggau “bungai” pua. Udah projeknya siap manah ga penyadi pua tu peda mata aku. :)
Pua corak biru - diberi aku ka menyadi aku ka tuai sekali.Pua corak ijau - diberi aku ka menyadi aku ke lumor 2 tuai.

Pun bulan dua2010, aku ngaga dua itu pua lalu diberi aku ka menyadi aku ka diau diKL alu siti ka menyadi aku ka tuai diau diMiri. Aku nyiap ka dua iti pua tu dalam timpoh dua bulan! Boleh tahan ma udah ka ngansing kediri! Enda berasai tembu pengawa digaga! He..he..he...

Naka tu dulu cerita aku sekali tu. Semadi nadai meh! :)

Meri tabi Selamat dalam Pengrindu Allah Taala nuju kitai semua. Shalom!

Ayam Baru

2010-03-29T19:12:00.002+08:00

Bisi dalam dua tiga bulan ti udah, kami duai pangan aku kerindu amat ngaga kain tampong seribu ingin amat deka ngembuan siti injin jait ka ulih ngaga macam-macam corak jait. Nyadi nambah ka ati gian ianya laban petunggal iya udah meli injin ka disebut aku tu. Pia mega diperansang raban kami ka endang selalu begempuru ngaga projek mit-mit.

Puas ka meda gambar injin nya dalam internet, dia deh kami duai lalu berunding meli enjin tu. Siti enggi siko. Nya lapo deh! Ma bisi orang deka “menempah” munyi ko jako laut, kami duai deka besaup nyait “tempahan” orangnya. Enda anchi-anchi munyi utai!

Nyau kepuas ninga “jako asutan” pangan diri, kami duai pan lalu ngoder enjinnya ari NZ. Dalam awak 2 minggu udah ngoder, datai meh ayam kami duai dimua pintu. Akai-rai gaga amat ati meda ayam udah datai. Alu dibongkar ari bungkus serta dibantai ka semua perengka kedalam kotak besainya! Aku enda tentu nemu nampong perengka enjin tu, nya alai agi bereba ba bilik. Enggi pangan aku udah siap ditampong. Udah berengkah bejait ngena enjin baru meh kaban aku nya! Lawa amat!

Dia bisi awak lantang, aku deka ngasoh pangan aku tu nulong aku ngadu ke enjin aku tu. Ma dah siap, aku mandang ka gambar iya ditu ila.

Tu meh ayam ke lumor 2 mar kala dibeli aku sekumbang ka agi kerja tu. Iya ka kumbai aku mar dulu suba, ianya “electrolux electronic sewing machine”. Tang diatu ianya lumor 3 mar enti dibanding ka dalam rega ringgit Malaysia. Oh! Engka kita ka nemu ayam paling mar aku ianya “kereta”! He..he..he…

Belelak Ujong Minggu-Pengerami Trevor Jalla

2009-08-09T12:29:00.005+08:00

Kena ari lima minggu dulu nyin kemari (7hb Ogos 2009), aku, uchu aku Nigel enggau Nicole, menyadi aku enggau anak iya 3 iko bemalam ba Parkcity Everly Hotel, Miri laban ka bisi meli tiket meda pengrami “Trevor Jalla Performance – For Charity” ba Pavilion hotelnya empu. Kelimpah ari pengawanya, aku endang bisi ati deka belelak ari ngerja kerja rumah dalam minggu nya!

Pengeraminya cukup mayoh orang enggau meda, lalu bansa sida orang ulu kebatang ngaga pengawa tu. Bala sida YBs ka bisi datai iya nya Datuk Lee Kim Sim, YB Andy Chia, CEO MAS Datuk & Datin Idris Jala, Datuk & Datin Jacob Ridu, Robin Jalla and wife (apai-indai Trevor Jalla), YB’s enggau orang ka bepangkat besai megai menua serta bansa-bansa kebukai mega. Orang ka ngulu pengawa malamnya (Chairperson) iya nya Mrs Liza Chai ari Miri Red Crescent Sunflower Centre, Miri Chapter.

Nyadi Trevor tu landik amat bemain guitar lalu munyi nyawa iya mai leka lagu pan manah amat didinga. Enti kita ka lebih nemu sapa orang muda tu, ditu ruai iya.
Trevor Jalla Homepage

Kelimpah ari Trevor Jalla, band The Country Road pan bisi diundang belagu malamnya. Sida tu nyambut 25 tahun udah numboh ka band Country Road.

Bala tetamu ka bisi dikangau belagu iya nya CEO MAS, Datuk Idris Jala. Wah! CEO tu pan landik amat main guitar serta munyi nyawa iya belagu pan manah amat. Ukai semina landik ngemaju ke business MAS unggal tu, belagu pan pandai! Leka lagu iya lemai nya “HARI INI PANAS, TAPI ESOK HARI AKAN HUJAN”. Chapoh bala ninga leka lagu iya laban munyi leka sampi. Gaya ari diMiri endang lama udah nadai ujan lalu berasai angat beberapa minggu ka udah.

Amat lagu sampi lagu CEO MAS malamnya laban muak ketengah ari siti iyanya ari enam balat amat ribut betiup datai ari tasik maya kami duduk ngirup kupi pagi ari ba Melinau Coffee House. Nadai ujan tang ribut aja. Paduhal ujan laboh diLutong enggau sekeda alai diPujut. Puji Tuhan laban ninga ka sampi kitai!

Aku bisi ngambi gambar tang bedau ulih mandang keditu.

21/09/09: Sekeda gambar ka diambi aku leboh pengawa malam nya suba.

Selamat Gawai Dayak 2009

2009-05-28T12:22:00.001+08:00

Ari tanah bebiyau takang isang,
Tanah betuah asal kitai,
Tanah landai tanah papai,
Menua besumbar Panggau Libau,
Menua tebilang Aki Keling,
Menua benama tampak rita.

Ari aki kitai Bungai Nuing, Bungai Laja.
Ari ini kitai Lelengai Bungsu Kesumba,
Ari aya kitai Bungsu Kekura,
Ari endu kitai Bungsu Lelabi begambil bekapil cukup pemesai.

“Au”, ko bala sida Punga, ko anak Enchelegit enggai enda ampit.
Pulai magang bala kitai, pulai GAWAI ngintu ari besai kitai.

Ooo..Haaa..! Gayu Guru, Gerai Nyamai,
Bulih duit enggau ringgit,
Bulih pengaya, pengeraja lalu tebilang bangsa kitai
Nguan menoa Malaysia.

Mandi

2009-05-12T08:33:00.001+08:00

Enti bala kitai diau di bandar Miri tentu kita bisi ngasai ka pengangat ari ditu. Kadang-kadang suhu pengangat ari datai bak 34Deg C. Nyau nyengat asai panas ba tuboh. Kami menyanak nyau ka 24 jam masang air-conditioning laban enda tan ngenat ka asai angat.

Bala sida uchu aku pan bakanya mega madah kediri "peluh". Kasih meda tudah nyau jempok baju laban peluh. Nya alai ari minggu ka dulu kami duai anak aku ka benama Bills lalu mantai ka "rubber swimming pool" kena sida ngerendam diri. Enggai mai sida ngagai "swimming pool" awam laban pancar mata panas kelalu angat. Nadai penyadi abis kena "heat stroke".

Rindang serta rindu amat bala sida uchu aku nyemerai berendam sarinya sampai ari nyau muak ka lemai pan semadi badu mandi.

Aku arap ka pagila ari bisi chelap agi laban nitih ka "kaji cuaca", ari mendong alu bisi remang tebang dilangit. Besampi amat aku ngarap ka "suhu cuaca" urong 27 - 30 deg C.

Cuti-cuti ka Miri

Hari Indai 2009

2009-05-11T21:49:00.007+08:00

Kami ngintu Ari Indai enggau bala menyadi, anak, uchu, menantu srta enggau orang ka paling dikesayau kami iya nya indai kami empu. Kami begempuru makai lemai kena ari minggu tu tadi. Taja pan penyampau iko kami nadai maioh tang kami rindu serta gaga ulih betemu bebuti alu bekenang ka semua pengerindu siko-siko enggau pangan diri. Iya kelebih agi kami meri besai terima kasih ngagai Tuhan laban ka udah ngempuru ka kami sekali agi alu ulih ngintu Ari Indai enggau indai kami.

~ Aku nyebut "Sampi Ari Indai" ngagai nuan Mak lalu meri terima kasih ngagai Tuhan laban iya udah merkat kami enggau pengasih, penyayau serta penyinu ka diberi nuan ngagai kami selama-lama tu. Aku besampi ka nuan jampat gerai, panjai umor serta bulih pengelantang selalu. Sampi tu aku pinta dalam nama Tuhan enggau Pengelepas kitai, Yesus Kritus. Amen.~

Raun-raun

2009-04-22T12:40:00.010+08:00

Ujong minggu nyin tadi aku enggau siko pangan aku bisi raun ka Kuching. Kami duai berangkat ari Miri urong jam 2.35 tengahari 17 April 2009 lalu mulai kediri ari Kuching kena tengahari 19 April 2009.

Nyadi tiket bilun endang udah lama diboking, ianya bulan dua tu tadi. Tambang tiket kami duai siko semina RM100 pulai mansang. Tiket tu murah laban maya nya MAS bisi promosi tiket bilun murah. Kami duai nyua bilik siti siko ba Harbour View Hotel. Umbas iya pemanah ga bilik kami duai nya. Gambar ka dipandang aku ditu diambi aku ari bilik aku.

Leboh ka di Kuching kami duai endang nadai ati ke bebeli ke utai tang semina ka relex lalu ngerindang ka ati aja.

Lemai ari keterubah kami duai datai kami duai ngambi teksi alu nurun ngagai siti pab ke dikumbai “Victoria Arms” ba Merdeka Palace. Penyampau orang malam nya maioh amat lalu rami mega. Bala sida “waiters/waitresses” endang enda ngetu nganjung ai arak/bir enggau ai oren (fizzy-drinks) ngagai bala tetamu dia. Live Band ka bemain dia pan mai rentak lagu enggau muzik ka ranchak amat. Goyang-goyang ga tuboh kami duai kawan aku! Eessh...enggau tentu balat takut urat abis besintal ma bai goyang-goyang kelalu balat. Enda ulih tunda gaya linggang sida ka biak agik.

Malam ari enam kami duai pansut begayut baru enggau kawan menantu menyadi pangan aku tu. Dia deh kami duai diasuh milih ni bagi pab ke ka dituju. Pangan aku madah iya ka ngabas pab Iban. Dia bisi alai karaoke kenu ka iya. `Ok. Good idea`, ko aku nyaut. Mayoh pab ka dipansa leboh maya ka begiga ka pab Iban tang alu ga bedau setuju siti ni bagi ka deka alai ngetu. Nyau kepuas talipon ngagai menantu menyadi iya pangan aku tu tadi lalu nanya ka dini alai “Tubai Pub” ka digusong sida suba. Datai ba alai “Tubai Pub” kami tiga enda niki pab nya tang niki pab ke sepiak agik. Alu dia meh kami 3 lepak sambil ninga bala-bala pengabang bekaraoke. Umbas iya ga pengrindu sempi aku lalu sebedau pulai, kami ngirup kopi enggau makai tom yam soup ba kedai kopi pab cina ke benama "Blue Village" (asai sepi aku nya nama pab nya). Eeshh! Enda ingat laban leboh maya ke merening nama pab "untak" benong sebening-uing! :)

Ari minggu lembau amat angkat pagi tang maksa diri laban sayau ka “baucer sarapan pagi”. Nat ka pala ka agi bungau meh kami duai pagi nya. Muak ke tengah ari kami duai mulai kediri ka Miri lalu datai urong maya jam 1.40 tengahari.

Sebedau bersara dia pangan aku alu nyebut “Ila janji baru tuo au? Mai pangang tuo ka siko agi au?”. OK aja saut aku.....janji bahagia!

Pengerai

2009-04-21T11:34:00.006+08:00

Ninga cerita bala raban betusoi kediri pedis kaki, aku pan deka nusoi pasal pemedis diri empu mega.

Aku lama udah nat ka pedis tapa kaki alu datai ba punggung. Pengelama aku asai tu kira-kira udah 6 taun.

Enti aku udah lama dudok lalu deka angkat, aku enda tau bediri enggau jampat tang belubah-lubah. Enti bediri ngenyit dia deh berasai amat tulang punggung asai ka patah. Nya alai nyau ka tiap-tiap lemai ngunsut abi pedis enggau minyak kapak tauka rimau. Ma enda ulih tat alu tampal enggau kuyok. Bisi nyamai mimit ga asai diri ma udah digaga caranya. Tang pemedis nya enda lalu lenyau tauka gerai.

Aku pelaba kebuah kaki aku pedis engka laban aku diatu nyau gemuk agi alu tuboh berat. Dalam takah enam taun ke udah berat tuboh niki ari 50 kilo ngagai 67 kilo. Maioh amat penyampau kilo nya nambah laban sebedau tu abis tinggi pemerat tuboh aku semina 60 kilo. Nya pan leboh maya aku ngandung ka anak aku ka lumor dua. Udah abis bepantang maya udah beranak pemerat tuboh alu surut baru ngagai 48 – 50 kilo.

Agi suba aku rindu enggau orang eksesais baka “aerobic” 3 kali dalam seminggu, main “squash” enggau “jogging”. Diatu ukai aku enda rindu tang sekumbang ka udah bisi bala uchu nyau lembau amat enggau orang bepengawa bakanya. Nya alai nyau buntok meh gamal tudah aku diatu.

Pia mega urat (vericose veins) nya tampak ayan ba pah, betis enggau kaki. Engka laban urat-urat tu kaki-betis aku berasai pedis. Enti maya ari balat panas dia aku meda urat kaki aku nya endang berupai amat timbul. Kadang-kadang dipasang ka selipar enggau kasut ka lawa-lawa pan nyau enda manah dipeda ga gamal kaki. Peda kita gambar kaki aku ma maya ari balat angat, urat kaki aku alu balat agi ayan. Nyau kembai enda tentu gamal kaki aku. Munyi ka sida menyadi aku ‘Nyau Melut’. Eeissh... teruk amat.

Nya alai kediatu deka nguji ngerendam kaki dalam garam “Epsom Salt” ka disebut bala kaban bloggers ditu. Ngicha ka bisi insur meh pemedis kaki tu ila. Nganti udah berubat baru nusoi pasal pemansang pengerai diri baru. Selamat ngintu pengerai nuju bala-bala kaban.

Computer Genius

2009-02-13T12:19:00.003+08:00

Sapa bala kitai enggau nyadi “computer genius” dalam dunya teknologi tu. Baca cerita pasal anembiak siko tu ka bisi enggau nulis siti ari komputer program iPhone.

9:20pm UK, Thursday February 12, 2009

A nine-year-old computer boffin has written one of the world's most popular programmes for iPhone. Lim Ding Wen, aged nine, thinks computer programming is easy Lim Ding Wen has already mastered six computer languages and has been unveiled as the brains behind Doodle Kids.

The application has been downloaded more than 150,000 times from the online Apple store making it one of the site's top 10 purchases. But Lim remains modest about his incredible achievement. "I don't think it's difficult, except those long, long, long, syntax," he said when asked about programming.

By day Lim behaves like any other child in Singapore, going to school before returning to do his homework. But when his studies are complete he spends hours writing complex programmes for computers and other gadgets.The boy started using a computer at the age of two and has so far finished 20 projects.

Doodle Kids allows users to draw by touching their fingers to the iPhone screen, then clearing it by shaking the device.

Lim said he designed the programme with his younger sisters in mind and "because (I) wanted to make a very simple painting programme, especially for kids. "I don't think it's difficult, except those long, long, long, syntax."Lim Ding Wen

Lim's father, Lim Thye Chean, is a chief technology officer for a local firm and said his son grew up surrounded by computers. He taught Lim the basics on an old, yellow, 16-bit Apple II GS computer and was amazed when he started writing his own games.

"For the things he does, basically he thinks what he wants to do, we just give him ideas. Sometimes he's quite frustrated, it's quite frustrating for him," said Thye Chean.

Asked what he wants to be when he grows up, Lim replied, a little predictably perhaps: "A programmer, because I just want to be a programmer."

Source : Could this be the new Bill Gates

Ujan Bulan Januari 2009

2009-01-10T14:23:00.007+08:00

Dalam seminggu ti udah, gaya mua ari kami di Lutong suah amat ujan. Ujan enda balat, tang suah sampai pagi ari siti. Tang saritu tadi, ujan balat amat. Nyau baka ka dibuboh ai ujan ari langit, munyi ka jako sida indai aku ma maya ujan balat. Ujan pagi tadi endang bejurut ari demalam.

Aku bisi enggau bala sama kerja ngintu pengerami parti pencen staf kami ba Grand Palace Hotel, Miri. Benong ka enjoi sempat ga aku merening keluar merati ka kilat ka manchar dilangit. Ati aku semampai irau alu jam pukul 10 malam, aku madah ka diri pulai.

Maya aku ninggal ka alai parking kerita hotel nya, ari bedau ujan. Nyau aku datai ba senentang Pujut 3, dia deh ujan naka iya pemalat! Waiper kerita ngena ka paling laju kena aku, tang enda ulih peda tanda jalai empa pemalat ujan. Aku begadai-gadai driba kerita aku niti jalai besai nuju ka Lutong. Datai ba simpang 4 Gereja Good Sheperd Lutong, dia deh simpang jalai sama ga enda ulih peda. Ni bagi parit, ni bagi jalai alun, nya enggau nasib diri milih ka betul laban kawasan nya ampoh lalu tambah ka "pasang besai".

Begagar kaki nekan ke minyak kerita takut kediri masuk parit! Ati aku balat amat irau serta berasai takut, meda jalai alun penuh laban ai. Nyau baka sungai menua nya dia. Kelama iya datai ga aku dimua pagar rumah. Apoo! Tengah laman rumah endang udah penuh ai; datai ba buku ali maya aku pansut ari kerita muka kunci pagar. Aku besampi meri terima kasih ngagai Tuhan laban aku udah selamat datai dirumah.

Ujan alu semalam-malam nyentok ka pagi tadi. Tang maya jam 8 pagi tadi dia deh ujan tak naka iya balat. Parit besai ampoh lalu ai iya meluah ngagai jalai raya. Bisi sejam setengah ujan turun, urong pukul 10 baru iya ngetu. Maya iya ka bangat amat, aku endang enda ngetu besampi minta ujan ngetu alu ngarap ka enda bah! Irau ati laban rumah kami menyanak endang semak tebing sungai Miri. Alai tu suba "the deepest area" maya bah Taun 1981. Dia kita ngira, jembatan Lutong pan nyau ka ampoh laban bah taun nya suba. Eeee... nyeregu bulu ma aku ingat ka bah taun nya suba. Nasib ga rumah los Shell alai kami menyanak diau maya nya suba enda ditiki bah. Mayoh macam utai melepong mansa rumah kami maya nya, sampai ka kami menyanak tetemu ke lesong kayu ke cukup iya pemesai tesangkat ba batang pun pinang ka tumboh ba belakang rumah kami! He..he..he.. pama amat bisi kena nutok daun ubi enggau belacan lesong nya suba. Diatu nadai agi wai! Dah buruk!

Ka diatu aku arap ka ujan tau ngetu tang enti agi ujan arap ka enda ngemalat pagi tadi. Gambar ditu diambi aku leboh maya ujan mupok ngetu.

Betemu enggau Mr-EX

2008-10-29T20:05:00.001+08:00

Minggu nyin tadi, anak aku ke tuai esemes aku ngasuh aku ngambi ya ari Sribima Maritime Training Sdn. Bhd, udah ya ka abis trening dia. Aku pan alu ngambi ya jam 4 lemai. Kala ka mansa jalai Senadin, dia aku alu madah ka ya deka ngambi anak ya (uchu aku ka biak) ari rumah sida petunggal aku. Udahnya kami menyanak alu ka pasar enda lama meli lauk serta perengka bukai mega.

Pulai ari pasar, kami duai lalu nganjong uchu aku pulai kerumah laban indai ya pan udah datai ari kerja. Enda mukai-mukai kami duai anak aku alu bepikir deka lepak enda lama bak The Other Office Pub. Agi pan anak aku tu nyau deka turun kerja ka laut baru kena ujong minggu nya.

Datai kami duai bak rampa menua OO, dia deh kami duai besebut ka adik ya, enti ya udah abis kerja ulih ga enggau kami duai lepak. Driba kami duai nuju alai paking motosikal belakang Grand Palace Hotel, tang nadai meda motosikal adik ya.

“Eh! Enda ngawa nya deh. Tua aja ga ngirup”. Ko aku. Udah kami duai nuduk kediri ba bar OO, kami duai ngoder “one bucket happy hour carlsberg beer”. Baru ka ngirup segelas siko, dia deh adik ya esmeses ya madah ka diri boring diau dirumah kediri alu minta ambi. “Hmm... tentu ya nanya bini nuan dini penunga tua”, ko aku madah ngagai anak aku ke tuai tu. “Amatnya” ko ya nyaut aku. Aku pan alu ngasuh ya ngambi adik ya kerumah.

Baru berapa mimit anak tuai aku udah pansut ari OO, dia deh tak enda mukai-mukai tama Mr-EX enggau bala kawan ya. Siko ari sida pangan ya, ipar aku empu ka diau di Bintulu. Apoo! It’s a small world! Naka meh enti sida anak nyau datai lagi, tentu tekenyit meda apai sida bisi ditu. Ko aku bejako kediri.

Peda alu mansang ambai lama nuju aku, alu besapa serta betabi kami duai sama-sama nanya ke berita pangan diri. Aku madah aku datai enggau anak tuai kami duai, tang ya pulai ngambi adik ya ari rumah. “Ooh! Manah meh nya. Lagi enggau aku ngirup sepiak nyin sama enggau bala pangan aku ma seduai menyadi dah datai“. Ko ya nyaut aku. “Ok!“ Ko saut aku. Mr-EX alu mulai kediri ngagai bala pangan ya.

Nya meh bala pangan aku ka kerja dia bela senyum tersengeh-sengeh munyi ko laut, ketawa meda ulah kami duai Mr-EX! He..he..he. Agi mengancam ga aku peda ya neh?

Datai seduai menyadi di OO, seduai pan sama tekenyit alu betabi senyum meda apai seduai bisi dia. Udah tabi, seduai alu jampat jampat napat ka aku enggai duduk enggau apai seduai. Meda bakanya apai seduai pan alu mansang ngagai kami, alu becerita panjai nanya brita ari siko-siko. Mr-EX madah ya bisi intebiu enggau kompani baru alu sida ka enggau ya ngirup nya bala sida “BIG-Guns“. Whatever! Big guns small guns they are all the same! Ko aku mut-mut!
Udahnya ya minta kawan aku ka kerja dia ngambi gambar kami menyanak. Wah! Untuk kenangan Mr Scooby-Do-By-Do la gambar tu! Ko aku bejako dalam ati diri. Nama agi dianti deh! Senyum lebar “cheezy-rings” la kami menyanak begambar malam nya. :)

Tusah Senyum

2008-06-18T21:08:00.001+08:00

Kemaia ari tu pedis ka meda orang senyum tauka besapa enggau pangan diri ma leboh maya betemu. Suah aku tepeda ka bala kaban ka endang lama udah enggau bekelala, tang sida iya enda meri senyum tauka jako sapa taja pan aku senyum dulu. Nyadi kebuah aku senyum lalu ketawa gaga laban rindu ulih betemu serta ati ingin deka betanya ka berita ari sida. Bisi ga bala pangan lalu nyaut sapa enggau senyum aku, tang mayoh agi ka enggau gaya semadi.

Saritu tadi leboh aku ka klinik, aku bisi betemu enggau bala ka endang lama udah enggau bekelala lalu pia mega endang diau berumah sekampung munyi ko jako laut. Aku mansang besapa enggau bini iya ka senyum lebar lalu nanya ke rita pangan diri kami duai. Tang utai ka ngasuh aku bangat iran ati iya nya laki iya ka tak merening aku “as though I am looking for trouble with him” tauka “who do you think you are to dare approach me” attitude. Pee! Lalu pandak singkang aku deka nyemak kediri ngagai seduai melaki-bini.

Apoo! Balat amat ga penyumbong bansa kitai ma dah bisi ngasai ke diri lebih nyamai ari orang bukai. Tang dipelaba ka aku, enda orang merening reta tengkira iya, tang ka agi orang merening ulah “kurang budibasa” iya. Bekerja ba komponi besai, pangkat besai, rumah besai, semua besai tang sayau budibasa bedau cukup kena ngulih ke status “handsome gentleman” apa tah lagi status orang ka bisi "class" munyi ko jako ribai.

Ma agi baka aku ka bekuli begiga ka belanja kena beridup ari-ari enda iboh mandang ke lagak. Nadai kitai nemu orang ka dipeda kitai baka orang papa, kada enda lebih besai agi pemisi iya dalam basa enggau reta ringgit. Enti dah nyadi “towkay sendiri” tau ga mandang ka pemisi diri kini?

Tang nyau berunding kedua kali pasal cerita aku ari pun tadi, kada enda iya cemburu ka aku kini? Eh! Boleh jadi kot!

Udah tu ila nemu aku cara senyum ngagai bala pangan ke belagak bemunsoh enggau aku... kumbai orang laut "senyuman mengada-gada" awak ka nambah ka saham sumbong sida iya!

Sempama jako orang ribai "I never wonder to see men wicked, but I often wonder not to see them ashamed".

Selamat Hari Indai

2008-05-11T22:35:00.001+08:00

Meri tabi Selamat Hari Indai ngagai bala indai-indai ba dini-dini alai kita ngintu Hari Indai saritu.

Kami menyanak ngintu Hari Indai ba rumah indai aku di Piasau Jaya, Miri. Pengerami kami sekali tu mina bebai ngirup kopi sambil makai kek "Hari Indai" ke dibeli aku ba kedai Ma Baker, Saberkas. Bisi sunyi mimit pengawa kami sekali tu laban bala menyadi aku 3 iko nadai di menua Miri. Siko diau di Kuala Lumpur, siko di Bintulu alu siko ka lelaki nyau kerja nyadi luar bandar. Menyadi kami siko agi enggau bala gerempong indu gereja begempuru ba rumah Paderi Ugil.

Kami sebilik, mina Ted enggau menantu aku Tracy meri Selamat Hari Indai ngagai aku. Anak aku ka tuai nadai meri selamat tang iya bisi nalipon inik iya (indai aku) di Piasau. Bini iya Tracy, meri aku "bouquet of pink and purple carnations with a single blossom of purple rose". Bisi ga asai gaga ati aku udah ke nerima bungai ari menantu aku. Enti enda majak "moody" aku sepagi-pagi nya. Enda nemu kebuah, tang tak "moody". Kasih bala uchu abis kena "tengking" ma kelalu mayoh utai dipinta. Nasib ga enda lama aku berasai ringat.

Mulai ngagai pengawa nyambut Hari Indai, sebedau kek dipotong aku minta indai aku begambar dulu enggau kami ka bisi begempuru dirumah. Sinu ati aku meda gamal indai aku dalam gambar tu, laban iya nampak tusah ati. Iya enda tentu pengerai alu suah serbana ngelu pala enggau pedis atau. Nyadi iya ka bendar iya bisi pemedis jugal alu engka laban nya mai iya ngelu pala mega. Taja pan iya bisi tinggi darah, tang ngelu iya tu ukai tegal tekanan darah iya tinggi. Kami menyadi pan enda nemu nama kebuah pemedis iya tu baka ke nyelai amat. Taja pan pia, kami besampi ka iya sabar ngembuan pemedis iya tu alu bepegai teguh ke pengarap tau gerai enggau jampat. Tuhan aja meh lebih nemu nama utai ke baik ka bala anembiak iya.

Nya alai, aku besampi ka indai aku jampat gerai ari pemedis ka diasai iya diatu, alu arap ka iya meruan dalam semua pengawa ka dikerja iya. Pia mega aku besampi ke Tuhan semampai ngibun iya dalam berkat enggau kuasa Roh Alkudus. Aku minta sampi tu dalam nama Yesus Kristus, Tuhan enggau Pengelepas kitai.

Selamat Hari Indai ngagai nuan Mak. Kami semampai sayau ka nuan.

Raun Ngagai Menua Kuching

2008-04-11T12:32:00.004+08:00

Kena ari lima minggu nyin kemari, aku enggau 2 iko uchu aku ke benama Nigel enggau Nicole, serta anak menyadi aku 2 iko mega, Diana enggau Daphne raun ke Kuching. Nyadi kami raun kin ngena bilun, lalu tu meh terubah ya Nicole nepan bilun. Berapa ari sebedau kami berangkat, kagit amat bala uchu aku! Seruran itok nanya kemaya ari ka mupok. Enda ulih saut belama seduai iya, kelebih agi tanya ari Nicole. Nyau munyi burung semalau. Bak tiap awak lepa iya nyebut ka `pegi Kuching nek’.

Au pulai ngagai pun cerita, datai kami di padang bilun diMiri, dia deh Nicole bisi gamal rawan ninga rengong ari bilun ke bisi terbai enggau terengkah dia. Nyadi Nigel enda takut laban udah kala nepan bilun maya kami raun ka Kuala Lumpur taun 2006.

Nyau maya jam ka boarding, dia deh bala penumpang diasuh bejalai kaki nuju pintu bilun. Leboh maya tu meh pekara paling lucu nyadi. Aku berasai geli ati bisi ga, berasai ringat pan bisi. Nama kebuah pia, laban Nicole nyabak rauh-rauh mai pulai. Iya empakap ba aku alu enggai leka-leka, sampai nyau enchekak rekong! “Apoo! Naka meh sut Nicole tu”, ko aku gut-gut. “Pulang nek, aku mau pulang rumah nenek. Sik mau pulang rumah mama, pulang rumah nenek ok? Sik iboh pegi jalan nek! Pulang nek!’ ko iya. Aku enda iboh ka jako iya tang majak bejalai jampat-jampat nuju nuju tangga bilun.

Datai ba tangga bilun, balat agi ga Nicole nyabak sampai nyau bepaut ba tangga bilun! Akai rai! Terok amat meh sida uchu aku tu deh! Iran ati aku lapa iya tu bangat takut amat.

Udah tama dalam bilun, bisi kurang mimit iya nyabak engka laban munyi rengong enjin bilun enda tentu ingar didinga iya. Nyau kami datai ba penudok diri empu dia deh iya enggai duduk kediri tang puas dipujuk, ka ga iya.

Nyadi Nigel alu madah, ‘Nicole, jangan nangis ko. Kelak kita makan? Tengok buku tok, ada banyak barang makan, kan Nek? Kelak kita beli baju also, beli cola also, kan Nek?. Eeeh! Geram aku keh seduai dua tu, tak enda ulih saut. “Au! Ok! Jangan bising. Pasang lok tali pinggang ya’. ko aku nyaut tanya seduai.

Nama deh, bebeli ke utai dempa meh kami dalam bilun. Meli sandwiches, biskut oreo, ribena juice, pepsi enggau cashew nut. Gaga sida uchu aku meda pemakai tu. Aku pan berasai lega mimit tang bedau ga ulih duduk jenuh.

Nyadi bisi 3 iko anak bujang ka duduk berimbai enggau kami. Sida tiga tu meli ‘packed-meal’. Alu ko makai utai baka enggi orang nya ga seduai iya. ‘Aduh bah! Sik iboh! Udah cukup barang makan kitak duak iya. Kelak luek!’ ko aku nyaut peminta seduai. Agi itok meh seduai iya dia, aku pasang pending bengal.

Enda berasai jam bepusin lebih kurang sejam, kami pan sampai ba padang bilun menua Kuching. Aku alu besampi meri besai puji enggau terima kasih ngagai Tuhan laban ke udah ngemata lalu ngenatai ka semua kami kedalam bilun nya enggau selamat.

Nigel enggau Nicole pan gaga amat leboh pansut ari bilun. Kami alu nepan teksi ka alu mai kami ngagai Holiday Inn Hotel, Kuching. Kami diau ba Holiday Inn 2 malam. Leboh dalam teksi, Nicole hairan lapa kami nepan kerita orang. “Siney kereta kita Nek? Apahal pakey kereta Apek? ko iya nanya aku. Duh! Agi sesat meh runding tudah uchu aku ka indu tu! Aku alu merap iya, nyium iya ba pala, alu madah ka iya kerita kami tinggal di Miri kena Aunty Tracy nganjong Trevor nurun skula. Nicole senyum lebar alu nganggut ka pala. Berasai sinu ati aku ingat ka tudah iya balat takut nepan bilun tadi. Kati meh gaya maya pulai ila.

Maya ba Kuching, bisi agi ka utai ke diketakut ka Nicole. Iya takut meda tugu “mayau’ kena ngelai nama menua “Kuching” bak depan hotel alai kami bemalam! Kami deka begambar kena ka pengingat lah konon! Enda mukai-mukai Nicole remban meda mayau naka iya pemesai! Aku irau ati maya kami ke ngambi gambar, enggai ka Nicole belanda ngagai jalan alun! Jampat-jampat aku ngijap ka kamera alu udah nya kami mulai kediri ngagai hotel. Akai rai! Ka pedis mimit meh mai Nicole tu raun jemah ila. Aku arap ma iya nyau besai agi iya ulih muai asai takut ka bisi ba iya. Besampi aku ngagai Tuhan, meri iya pengering dalam pengidup iya belama-lama.

Sekumbang kami datai, kami mina ulih raun meda kedai-kedai ka ngelingi Holiday Inn lalu ‘shopping’ ba Tun Jugah Complex, The Spring enggau bak kedai ka semak.

Kami nadai ngagai tempat baka The Sarawak Muzium, Fort Margerita, Kuching Waterfront (maya malam ari) laban nadai tentu awak lalu tanggul laban ari suah ujan muak ke lemai.

Taja pan pia, kami gaga amat ulih ‘relax’ enggau ‘enjoy the short break away from home’. Kami mulai kediri ka Miri kena pagi ari minggu. Puji Tuhan. Nicole enda takut agi masuk kedalam bilun laban utai keterubah diingat ka iya enggau abang iya Nigel maya dalam bilun iya nya meli utai diempa. Aisehman! Inflight shopping tek konon!

Trevor di ibun "Aki Cina Yong"

2008-03-31T21:43:00.001+08:00

Kena urong 18hb Mar 2008 tu tadi, Trevor enda agi dianjung indai iya ngagai Sedidik Day Care Centre. Nyadi kebuah pia, laban ngelama tudah iya di ibun orang dia, iya ka amat sakit angat, batuk lalu sampai mai iya bisi datai sesak seput.

Iya tu endang bisi "mild asthma" lalu laban iya engka enda lantang di ibun orang ba day care centre, iya di pelaba aku bisi "stress". Nyau lebih sebulan iya enda ngetu angat, batuk enggau berinsak. Meda bakanya, aku lalu berunding enggau apai indai iya ngasuh seduai ngiga bala kaban diri empu beribun ka Trevor.

Sebedau bisi anggur deka dianjung apai-indai iya ngagai day-care centre, bisi aku nyebut ngagai bini petunggal aku enti iya deka beribun ka uchu aku tu. Nyadi iya deka beribun ka aku, taja pan iya endang udah ngibun uchu niang petunggal aku ari iya agi baru ada suba.

Nya alai, betukar alai meh tudah Trevor diatu. Beberapa ari sebedau bini petunggal aku berengkah bribun, kami mai Trevor nemuai ngagai rumah sida awak ka iya ngelala tempat baru iya ila. Iya enda takut ka sida petunggal aku sebilik lalu meda gaya nya, ati aku pan berasai gaga.

Sekumbang Trevor betukar alai, dia aku meda iya bisi berubah gerai agi. Dalam beberapa ari tu agi mega iya sakit angat enggau batuk, engka laban iya ka benung tumboh gigi. Taja pia, iya dipeda aku rindang agi lalu enda balat meraya.

Maya pagi ari sebedau seduai indai iya turun beranjung, aku nundi iya madah ka iya diatu skula ba "Curtin University" lalu lecturer iya "Aki enggau Inik Cina Yong". Kebuah aku nyebut iya skula ba "Curtin University" laban rumah petunggal Cina aku tu enda jauh ari university tu.

Serbana Tengahari

2008-03-28T21:36:00.000+08:00

Akai rai! Tengahari tu tadi, boss aku ngasuh aku betemu enggau iya pasal kerja. Bisi utai salah gaga aku, ko iya. “Aduh! Nama nya kini?“, ko aku nanya diri empu.

Datai ba bilik opis boss aku, aku alu kena “lecture” pasal bisi pengawa salah gaga.
Nadai tak besai penyalah ka digaga tang laban bansa sida orang ribai endang enda alang alang ma bisi utai ka dipadah ka kitai.

Udah iya nunjok ngagai aku kerja ka salah digaga tadi alu mandang ka cara ti betul ngaga pengawanya, aku alu bejako. “Oh! Such small problem Sir! Why get so panicky?”. Iya alu nyaut, “Yes, I get really panicky on any small little things now. We got to work together and deliver the best result. We don’t want any slips in any of our data management.” Aku enggai enda malas jako iya, “Don’t worry Sir, it’s not the end of the world yet!” “Okay, okay. Whatever it is then”, ko iya nyaut enggau senyum lebar.

Nye! Nadai endar ga utai ngasuh sida boss panic! Mua meh enti langit tak runtoh, engka pepar dulu lari sida iya! Duh! Endang sama sut magang.

Eeh! Tang amat salah ga cara aku ngadu ke pengawa aku nya. Nyadi “database” ke dikena kami gawa tu utai baru. Nya deh kebuah agi bedau pandai amat ngena iya. Mut-mut aku ringat ke diri empu ka udah salah pengawa. Nasib ga nadai “major impact” ba bisnes kami. Enti enda udah “goodbye sweetie pie, out of the window you fly” meh tudah aku!

Amat sut! Kati ka balat amat enda pengingat diatu bah? Engka nya tanda komputer dalam pala tu nyau deka diubah enggau ka canggih agi meh awak ka ulih dikena orang dah umor tuai baka aku tu! Duh! Sut! Sut! Senyum kediri empu ga aku merati ke diri nyau majak lalek! Ka enggau bala kaban aku makai “gingko” aku tu! Nitih ka tusoi sida, tau ngasuh untak geliga ma dah makai ubat nya.

Au! Meda gaya enti bisi ubah cara bepikir ma dah makai “gingko”. Arap ke tau nyadi “the next genius “ dalam nama-nama kerja lah! Asal anang agi sut!

SUNYI

2008-01-24T23:17:00.000+08:00

Malam tu berasai sunyi sepi aku laban uchu aku ke biak tumu tindok. Suah malam iya enda ngenumu tu tindok tang saritu laban ya kelalu lelak dipelaba ka aku. Berengkah saritu, iya dianjung indai iya ngagai rumah alai orang ngibun anak mit. Dikumbai dalam jako ribai "nursery centre". Nyadi selama tu Trevor tu ibun ini iya, ianya indai indai iya empu. Tang dalam seminggu ke udah, ini iya sakit bisi tinggi darah lalu enda ulih beribun. Meda gaya nya, indai Trevor lalu berpikir manah iya anjung ngagai "nursery centre" ari iya kalat-kalat ngiga orang ngemata ka Trevor leboh maya iya kerja.

Nya meh lemai tu enda tentu rindang uchu aku tu, iya ka amat nyabak. Engka lelak meh tudah. Orang ke ngibun tudah ukai baka kitai ke endang beempu sida. Ma sida nyabak, alu ditanggung enggau berap kitai kena ngerindang sida. Enti ba alai ngibun bala anembiak mit tu tentu enda sebaka. Tang "apa boleh buat" nunda ka jako orang melayu, arap ke sida diibun enggau naka pemanah meh. Ati aku bisi pengirau meda tudah diibun bansa orang bukai, tang ko indai Trevor manah alai nya. Iya madah mayoh bala pangan iya ke sama enggau iya kerja nganjung anak sida iya kia. Bisi sekeda ari sida iya udah 2 tauka 3 taun diibun orang dia. Nya alai, ngarap ke jako menantu aku nya amat aja meh aku kediatu.

Kasih aku meda iya enda senang ati malam tu. Kasak kasak enggai dibrap nya alai alu diayun aku ba uyut. Enda lama udahnya iya alu lelap tindok. Indai iya pan alu mai iya pulai ke pangking penindok sida iya.

Nya alai berasai sunyi malam tu nadai orang enggau aku berandau enggau betundi. Uchu aku ke tuai agi nadai enggau aku ditu. Seduai iya enggau aku leboh maya ujong minggu tauka maya bisi cuti sekula lalu pia mega maya aku ti enda kerja.

Nadai ga tak ngawa aku kediri-iri, dunga-dunga meda TV, bisi ga awak alai aku "relax" mimit. Nya meh kebuah sempat mega betulis ka brita mimit ba ruai aku tu.

Selamat Hari Krismas 2007 enggau Taun Baru 2008

2007-12-30T11:52:00.000+08:00

Lama aku nadai tulis ba blog aku tu, laban leboh aku nguji nukar template tu suba link aku lenyau. Aku lalu ringat amat ke pengawa diri empu, nya kabuah enda betulis ka cerita ditu. Taja pan pia, kami menyanak nadai nya-nya lalu arap ke kita sebilik pan sama.
Enda berasai taun 2007 pen deka abis lalu tu datai taun baru 2008. Nama wawasan bala kita ka taun baru tu?

Aku arap ke kitai bulih berkat belama lalu besampi kitai gerai nyamai, senang lantang, gayu guru serta selalu beberkat dalam nama Yesus Kristus, Tuhan enggau Pengelapas kitai.

Top New_Year Comments Graphics

Berebut Ngena Baju Seragam Hari Merdeka

2007-09-02T09:53:00.000+08:00

Pemulai aku ari bebaris udah ke nyambut Hari Malaysia Merdeka 50 Tahun dipadang Miri Open Stadium, aku nyimpan baju seragam ke dikena kami sarinya kedalam bakul gari alai kami menyanak selalu nugong ke kain serta baju kedeka di basu.

Datai Nigel enggau Nicole, dia seduai iya tepeda ke baju seragam aku nya. Lalu berebut ka ngena baju "merdeka" tu. Sampai betempik ke pangan diri! Nama deh, nyabak meh seduai iya ma dah alah berebut ke baju nya.

"Nenek aku suka baju nenek, jangan beri adik", ko sabak Nigel. Iya lalu ngerampas baju nya ari adik iya Nicole, alu nyabak ga tudah nya mega! Apoo! Begau kami menyanak laban ulah seduai menyadi tu. Uchu aku ke nama Trevor pan nyau tepelut mata laban tekenyit ninga utai nyau inggar. Beguai aku nanggong iya ari baby-walker meda mua nya pucat!

Aku bejako madah ngagai Nigel enggau Nicole, ari seduai berebut manah seduai besilih begambar ngena baju tu. Ooh! Gaga amat seduai iya ninga aku ka ngambi gambar. Seduai iya balat amat gaga serta betanda dalam ruang bilik ngena baju seragam Hari Merdeka! Trevor mina enggau ngibar ke bendera aja! Bisi gaya "Anak Malaysia - Generasi Muda" sida bala uchu aku tu!

Merdeka! Merdeka! Merdeka!

Nyambut Ari Malaysia Merdeka ke 50 Tahun

2007-09-01T21:45:00.000+08:00

Dalam sebulan ke udah, aku giat amat enggau bala sama kerja trining bebaris. Kami milih diriempu ngari ke kompani alai kami gawa enggau orang ngerami Hari Malaysia Merdeka ke 50 tahun.

Umbas iya detat maya trining bebaris tu laban kami enda ngira ari ujan tauka panas. Suah agi kami bejemboi bepanas laban enti bisi ujan pan iya mina laboh maya muak ke lemai tauka malam aja.

Kami diajar cara-cara bebaris siko ari soldadu ke bepangkat Sergeant ari kem soldadu menua Miri. Iya ngajar enggau cara "military style" lalu iya liat ati ngulu ke kami cara bebaris enggau betul. Kami trinning tiap-tiap ari satu, tiga enggau lima berengkah ari pukul 4.30 sampai 5.30 lemai. Lebih kurang sejam sekali nurun.

Nyau semak ari merdeka, iya nya kena 27 - 29 ogos 2007 kami diatur trinning ba "Miri Mini Stadium" . Tumu kami angkat dani, laban mesti datai ba opis besai alai kami gawa jam pukul 5 pagi laban berumban berangkat ka padang dalam pukul 5.30 pagi.

Datai dipadang, kami nyerta sida kontigen-kontigen ari komponi bukai ka endang udah bediri bepanas lalu belatih ari jam 7 pagi sampai 10.30 tauka 11.00 pagi. Umbas iya ditat pemisa panas dalam awak 3 hari nya.

Leboh maya ari merdeka "countdown" iya nya kena 30 haribulan Ogos 2007, kami nadai trinning tang diberi jako lalau enda iboh enggau orang ngerami "countdown" enggai ke enda tedani kediri pagi ari siti. Pia mega enggai ka bala sekeda bisi ngelu pedis pala udah bekau ngirup ai bisa leboh ke nyambut ari merdeka tu.

Nyadi tema kena komponi kami nyambut Hari Merdeka taun tu iya nya "jalur gemilang". Nya alai k kena 31 haribulan Ogos 2007, kami begari beseragam lalu gaya baju ke dikena kami sarinya bercorak "jalur gemilang" baka bendera menua Malaysia. Leboh ka bebaris masa "pentas Di-Raja" markah deka diambi dalam gaya pakaian ke dikena tiap-tiap kontigen serta enggau pemanah cari bala-bala kontigen nyambut tabik basa leboh maia Menteri Besai Negeri Sarawak, Pehin Sri Dr. Haji Abdul Taib bin Mahmud enggau Gabenor Negeri Sarawak Tuan Yang Terutama Tun Datuk Patinggi Abang Haji Muhammad Salahuddin meresa barisan.

Kami nadai nyangka tau menang laban tiap kali nurun trinning, bisi aja gaya ayun jari enggau kaki ke enda betul. Kangau Contingent Master "kiri kanan" tang kaki kami nyingkang "kanan kiri". Suah amat kami diperak Sarjan Army enggau Contigent Master ngasuh kami ngatur manah ke agi ayun jari enggau singkang kaki. Akai rai! Pedis amat meh ngasuh bala sama sama serta ngerja pengawa bebaris. Kadang-kadang senyum kediri aku meda gaya olah kontigen kami.

Taja pan pia, kena 31 haribulan Ogos 2007, kami digerah Contigent Master enggau jako perangsang "Let's do this for our company, for Sergeant "R" of Regiment DiRaja Malaysia and for ourself. Can we all do this or not?" Semua nyaut "YES enggau OOOH HAAA". Nyadi naka olih meh kami mai diri empu bebaris enggau cara cukup penglikun diasai siko-siko ari kami sarinya.

Tembu pengawa bebaris melintas Pentas DiRaja, bala kami jampat nanya Seageat Army sapa menang. "Mane le saye boleh kasi tau. Tunggu Contingent Master le kasih tau kamu orang. Untuk hari ini, balik rumah dan relex je." ko iya nyaut. "ok, ok, arap arap kita menang. ooh haa!", ko bala sekeda meri peransang ngagai kami ke bukai.

Sebedau mulai ke diri, kami dibelanja makai pemakai ari KFC (Kentucky Fried Chicken) kena merarau tengahari. Ukai sarinya aja kami dibelanja kompani makai, tang tiap-tiap kali kami nurun trinning kami diberi buah epol, oren, kek, karipap, roti senwich enggau ai mineral.

Nya berita aku ke enggau orang ngerami nyambut 50 Tahun Malaysia Udah Merdeka.

Merdeka! Merdeka! Merdeka! Oooh....Haaaa... Nya Kitai Ka!!

Cerita Bulan Tujoh 2007

2007-07-11T18:23:00.000+08:00

Lama amat aku nadai nusoi brita ba ruai aku tu. Ukai nama, kelalu balat kiroh ngerja pengawa ke enda tau enda di tembu ka dudu, nya meh kebuah aku nadai tentu awak nulis serta nusoi brita.

Dalam bulan enam enggau bulan tujoh tu, kami bisi kerja ngagai pelantar South Furious lalu udah nya dianjong belajar pasal teknologi cara-cara baru ngulih ke minyak enggau gas ba menua Brunei. Bulan Oktober tu ila, deka nampong penemu serta belajar negeri Singapore mega. Nya meh kebuah pengawa opis ka enda tau enda disiap enggau lengkas serta ditembu ka sebedau nurun belajar tu ila.

Cerita maioh ka ditusoi, baka pemansang bala uchu aku, penyampau maioh kain tampong seribu aku udah siap lalu maioh cerita bukai ke bisi nyadi dimenua Miri.

Baka pemansang bala uchu aku, seduai ke tuai agi nyau nemu ngerindang diri empu enggau main skula baka nulis, ngukir (cunting kertas ya ke bender), belajar ngurit basikal ngena taya dua iti aja, bekebun ngerumbak tanah dilaman rumah serta beselera amat makai!

Nyadi Nicole minat makai macam-macam buah lalu buah pisang enggau anggur dikerindu iya amat. Pasal bemain, iya ka endar ngerumbak parit ngena ranting kayu ma bemain dilaman rumah. Abis engketik latak lekat ba krita enggau dinding luar rumah laban iya. Ma iya nadai bemunyi diluar rumah, bisi meh pengawa iya nya. Tu tadi iya kenak sakit Jari, Kaki enggau Mulut (HFM - Hand, Food and Mouth) tang enda balat. Terubah disangka aku gigit nyamok tang menyadi aku kebiak madah ke aku nya HFM laban sebaka gaya kelai enggau enggi anak iya kebiak.

Tudah Nigel nadai apa nama lalu iya rindu makai ikan sardine campur kacang hitam enggau kulit manok goring. Iya enggai makai isi manok tang ka kulit manok. Ma kami menyanak makai ba KFC tauka SugarBun, kulit manok abis dikebas iya. Enti enda diberi iya ringat lalu enggai makai. “Unhealthy eating” ko bala kawan aku! Endang amat tang “what to do scooby-doo-by-doo" ko aku!

Kelimpah ari makai, iya rindu bemain basikal serta beguntin ke bungai. Abis lalak puchok bungai laban iya. Bisi bungai bonsai ke dikerindu ke Uncle Bills iya, nyau pandak lalu nadai daun laban iya. "Apoo! Parai kitai!," ko aku nyerauh meda bungai bonsai nya nyau enda temu gamal. Nasib amat leboh maia Uncle Bills iya pulai kerja ari tasik, daun bonsai nya bisi nersak baru lalu enda tentu nampak iya bisi di kacau orang. Aku zip mulut aja pasal tragedi bungai tu! He.he.he..

Baka tudah Trevor Kent nyau nemu rindang main enggau ayam getah iya. Laban ke udah bisi leka gigi seigi-igi, engka gatal asai gusi iya nya alai abis meh ayam tu ditusu enggau dikunyah iya. Pia mega iya nemu ngalih nungkup kediri lalu kering bediri tang bedau tau bejalai. Kadang-kadang simpan indai iya dalam baby-walker lalu ngena nya meh tudah iya bejalai enggau cara surut kebelakang! “Chali Taybo Boy, sik hebat” ko Nigel meda walker Trevor surut ke belakang.

Nya, baka pengawa ngaga pua tampong seribu, mina 3 iti udah siap. Siti iya ke ka aku beri ngagai kawan sama enggau aku kerja ke baru udah beranak, lalu 2 iti agi digaga aku ke Trevor.

Dalam minggu tu, kami menyanak besikap kerumah, muai utai lama ke enda dikena serta diguna agi. Pia mega aku betanam ke bungai orkid baru laban sida ka dulu suba enda tentu idup agi, nyau maioh layu serta mati. Nyau abis telanjai nadai daun semina tinggal batang aja. Orkid tu suba aku beli ari kedai bunga serta di beri bala kawan sama enggau kerja enggau ari menyadi aku empu. Bisi ingin ati aku deka meli serta betanam ke orkid baru. :)

Lalu baka menoa Miri bisi amat pemansang peda aku. Enti bala kita bisi kala nemuai ke bandar Miri, tentu kita bisi meda pemansang jamatan baru (flyover) ba Pujut roundabout. Enti leboh maia "peak-hour" jalai tu balat betakat laban kereta, lori, trak enggau motosikal. Nya alai anang enda bejimat-jimat ma leboh mansa simpang tu.

Bah naka nya dulu cerita aku, ila kitai betemu baru. Selamat dalam pengerindu Tuhan serta pengasih Yesus Kristus, penglepas kitai.

Pulai Cuti Gawai

2007-06-05T19:19:00.000+08:00

Berengkah ari enam 26 haribulan Mei 2007 tu tadi, aku berengkah cuti ari kerja opis lalu gagau ngerja pengawa dirumah nyendia ke utai ke deka dikena leboh maia gawai dayak ke ka datai.

Baru sari tu pulai kerja di opis tang pala agi berasai ngelu laban dipangka ai rimau demalam. Ka enda enggau orang ngirup, enda nyamai asai ga laban bala pangan bisi datai ngabang.

Nya meh, nganti untak aku bisi gerai lalu begeliga, aku nulis brita baru.

Selamat ke semua...... oooh.....aku palau...... :(

SELAMAT GAWAI DAYAK 2007

2007-05-24T20:46:00.000+08:00

Oooooo....... Haaa......
Oooooo....... Haaa....

O sapa ke ngangau, sapa ke nimbau
O sapa ke madah , sapa ke nelah
O sapa ke nyampi, sapa ke nanyi
Munyi menanyi manang chelung

Nadai dipinta, nadai ditanya
Nadai dipadah nadai ditelah
Nya meh aku enggau kami sebilik meri
Selamat Gawai Dayak ngagai semua bala kitai

Besampi ngajih ke taun ti ka datai
Tau begempong, tau begulai sejalai
Tau niki pangkat, bulih reta bulih tengkira
Ngambi ke kitai terus maju dalam semua utai

Kitai tau entuchong baka bukit
Tau ngebong baka langit
Jelai nama tampak rita
Gayu ko sentuku, gerai ko sempandai
Lantang senang ba dini dini alai diau

Nuju bala kitai bansa Dayak ke nyambut pengerami Gawai Dayak taun tu, sekali agi aku ngari ke kami sebilik meri

"Selamat Hari Gawai"

Selamat Hari Pengada Nigel

2007-05-21T12:53:00.001+08:00

Kena 20 Mei 2007, uchu aku Nigel ngintu hari pengada iya ka 4 tahun. Nyadi ari bulan iya ada tu sama enggau hari menua Miri di gelar Bandaraya.

Taun tu, Nigel enggau orang masuk ke nama iya dalam ngelumu pengabis maioh orang begulai berami ngintu hari pengada sida ke ada kena 20 haribulan Mei. Pengerami tu diintu bala maioh ba Dataran Kipas Miri (Miri City Fan) kena malam 19 haribulan lalu penyampau orang ke masuk ke nama sida dalam pengerami tu iya nya 211 iko.

Majlis Bandaraya Miri (MBM) pemegai rikot baru “Gerempuru Pengadis Besai Kunsi Nyambut Hari Pengada Rayat” dalam Bup Rikot Malaysia (Malaysian Book of Records) lalu ngalah ke rikot lama ke dipegai Pulau Pinang.

Kena meri terima kasih ngagai bala sida ke masuk pekit tu, Nigel bulih buah tenggak emas becampur emas burak, kupon kena meli kek, pen, baju T enggau seluar panjai ke dikena iya maia ari pengerami malam nya.

Leboh maia pengerami tu, bala artis bisi datai lalu Nigel gaga amat madah kediri bisi betemu “Auntie Artis” lalu nyebut “sida suka aku”. Senyum aku ninga cerita iya. Aku berasai gaga ati laban iya ngerami hari pengada iya dalam cara ke nyadi ke pengingat iya sampai jemah ila.

Selamat Hari Pengada nuju nuan Nigel. Nenek bersampi minta Tuhan selalu merkat nuan enggau pengelantang, pengerai serta umor panjai.

Berita dalam surat kabar Borneo Post

Selamat Hari Indai

2007-05-11T17:40:00.000+08:00

Selamat Hari Indai

From Grand Mama LimpyFrog

Aku besampi alu arap ke Tuhan Merkat Semua Kitai enggau Pengerai, Pengelantang serta Pengidup Ke Meruan dalam nama Jesus Kristus, Pengelepas Kitai.

Amen

Berita Terkini

2007-05-03T22:36:00.000+08:00

Pengerami “Mega WHPH”

Dah lama aku nadai nulis berita ditu laban maioh pengawa bukai ke enda tau enda di kerja dulu. Aku berasai ari pandak laban ke kiroh amat tiap tiap ari. Ni ke beribun ke bala uchu leboh maia apai indai sida bisi bejalai tauka kerja.

Pia mega minggu dulu nyin suba, kompani ke alai aku kerja bisi ngintu pengawa ke diberi nama “Mega Work Hard Play Hard”. Pengawa “WHPH” tu diada ke bak minggu ke 2 tauka 3 tiap-tiap bulan kena kompani beri bala orang ke kerja ka iya “work life balance”. Leboh maia tu, bisi sekeda orang main sukan, begempuru begerempong ngerja pengawa “charitable activities” serta enggau maioh agi pengawa bukai.

Sekumbang pengerami tu berengkah ari bulan March 2007, kami bisi bepekit dalam macam macam main lalu aku bisi enggau orang bemain netball. Maia ari penutup pengerami tu, iya nya tengahari 20 haribulan April 2007, kami berengkah enggau bebaris “Amoeba Parade” alu “Warrior Cry” raban kami iya nya “HOOO….HAA!”. Sekeda ari bala kami ngelinsu mua diri ngena cat awak ke nampak kering alu kuat lah! Baka muscle man!

Leboh maia nya mega aku enggau orang bemain “attack and conquer”. Rindu amat enggau orang main tu laban ka begagai ke pangan diri. Bisi ga asai peluh lalu lemak ba tuboh pan bisi mega lela mimit. Hai langgai! Au, maia lemai ari kami di jamu makai malam serta di perindang enggau lagu ari bala band ke di undang kena ngerami pengawa “Mega WHPH” tu.

Katak Dalam Bilik Dapur.

Uchu aku ke benama Nigel selalu madah ke diri bisi meda “frog” dalam bilik mandi kami. “Frog small got, frog big also got nenek”, ko iya. Aku mina nyaut “True kah ? Bila kau nanggar frog ya?“ Iya lalu nyaut, “Malam tadi nenek, big big like you small one like abang Nigel“ Aku senyum lalu enda kiroh ka jako iya agi. Itok meh iya madah ke aku pasal engkatak nya. Lemai ari siti, munyi nya baru ga iya, enda di iboh ke aku ga cerita iya.

Minggu nyin tadi leboh aku berapi, sepi aku berasai celap utai ngerayap ba kaki aku. Aku alu engkechit mai lungga lari ke bilik makai kami. Naka meh enti jelu nya tak ular ko aku bejako kediri. Bala uchu enggau menantu aku pan lalu enggau aku begau. Belubah-lubah aku nyengok ke dapur, dia aku tepeda ke engkatak ke di padah Nigel suba.
Apu! Nyelai amat gamal engkatak nya. Kulit iya becurak kelabu, tuboh iya besegi empat alu iya gemuk gedempol. “Issssh nuan tu, taja ka ngenakut ke aku, gamal enda ga tak manah ni, baka gamal aku” ko serabana aku leboh ke betangkap lalu ngambi gambar tudah engkatak nya! “Cute macam nenek frog tok kah?” ko Nigel nanya aku. Aku ngangut ke pala alu senyum aja. Enggai nyaut iya laban enti siti saut kitai, sepuluh iti leka tanya iya. Enda abis abis utai disebut iya. Nya deh meda aku enda nyaut, iya madah ke aku “kurang asam”. Nya, peda kita uchu aku tu, enti pasal bejako landik amat. Ngasuh aku geram aja. He..he..he.. Bah, naka tu dulu cerita aku. Ari bukai kitai betemu baru. Meri Selamat Ari Gawai Dayak, gayu guru, gerai nyamai, senang lantang nguan menua. Mupok aku.

Happy Easter

2007-04-08T09:00:00.000+08:00

Profilemix.com - Free Glitter Graphics

"Lord Jesus, I believe you are the Son of God. Thank you for dying on the cross for my sins. Please forgive my sins and give me the gift of eternal life. I ask you in to my life and heart to be my Lord and Savior. I want to serve you always."

BeautiControl®, a division of Tupperware®.

2007-04-03T12:49:00.000+08:00

BeautiControl®, a division of Tupperware®.

Produk baru tu berita "terhangat" ba bala kawan aku ke sama enggau kerja. Bisi sekeda ari sida diberi make-up set, gincu, skin-care ka present ari pengada serta krismas taun nyin tadi.

Tentu bala kitai maioh bisi tedinga ke pasal produk baru tu enti bala kita enggau orang nyadi pengedar tauka orang ke bekena ke produk Tupperware.

Sebedau aku ngena produk tok, aku ngena produk Maybelline enggau Avon. Pengelama aku udah kena produk tiga bansa tu cukup lama. Engka laban umur nyau majak tuai, dia kulit siko-siko kitai berubah. Utai ke berubah peda aku iya nya, mua aku balat amat beminyak taja pan aku ngena krim kena ngurang ke mua beminyak. Berasai nadai tentu insor manah kulit aku ngena perengka sida Maybeline enggau Avon tu.

Leboh umur agi biak-biak suba, ngena jenama baka Shiseido, Kanebo Estee Lauder enggau Elizabeth Arden. Tang udah ninga ari bala kawan serta maca ari Internet bisi “chemical” ke enda manah ke pengerai orang maioh, dia aku lalu ngetu kena kosmetik jenama tu tadi. Diatu aku mina ngena minyak wangi Elizabeth Arden.

Aku bersebena ngagai bala kawan sama kerja lalu dia siko ari sida ngenang pasal produk BeautiControl tu. Sida iya lama udah ngena jenama tu tang aku terubah ngena iya dalam bulan November 2006. Agi pan rega produk leboh maia bisi promosi umbas iya murah ba aku.

Produk ke terubah dikena aku ianya SkinLogics White Set enggau "Regeneration Gold” ka di promosi ngena jako “Works like a facelift in a bottle!”. Amat manah ba mua aku laban aku ngasai mua kulit beresi serta berasai beseri. Kedut ba mua enggau ba senentang rekong pun bisi tampak kurang mega. Wah! Lalu lekat meh gian aku ngena BeautiControl®.

Gincu Maybelline Terracota aku nyau dah ka abis, aku deka nguji set kosmetik sida mega.

Diatu Tupperware Campaign 3, 2007 benong 2007 (19 March – 29April 2007) bisi promosi bulih free Skinlogics Facial Scrub enggau Regeneration Extreme Repair Hand Therapy Travel Size. Rega semua utai tu mina RM199.00.

Kelimpah ari nya lalu munyi ko jako Puteri dalam blog iya, aku pan deka nguji Sculptique Body Contour Creme kena ngurang ke lemak ba pah enggau perut aku tu! Rega iya mina RM99.00.

Enti bisi bala deka meli produk tu, ditu bisi tangkir ruai alai kita ngiga pengedar di menua Sarawak.

Tanda Kelalu Manchal

2007-03-06T20:49:00.000+08:00

Enti kelalu manchal, kati ka enda bulih maioh pemedis. Abis mensul pala, banggur mulut, telih din ditu ba tubuh enggau biru kaki jari. Nyadi tu utai ke ka amat nyadi ba uchu indu aku ke benama Nicole. Taja umur ya agi biak, baru manggai 2 taun 6 bulan, tang iya landik amat niki. Nama bisi utai ke deka ati iya, ni peninggi pan, tiki meh! Nya alai selalu laboh alu bulih pemedis. Kadang-kadang belanda begagai enggau menyadi iya Nigel, lalu bejuk ke pangan diri, rebah ga tudah tuai. Bulih amat pemedis nama bemain.

Tu tadi, banggur mulut bai terap tersangkut kaki ba anak tangga dalam rumah. Lama iya enda bulih nginsap tusu ari botol lalu nya mai iya balat amat ringat serta nyabak. Aku kadang-kadang alit serta sinu ati meda iya ka amat bulih pemedis. Udah ga tudah mit enggau kurus mega lalu tambah ke mulut iya ke endang tebal, nyau nambah ke penebal mulut iya ma tepantup bai terap. Ka alah-alah pemajik gamal sida Angelina Jolie peda aku. :)

Amat lucu ga nama aku ngenang. Nya meh gaya bala anak mit ka “hyperactive” sampai pandak seput aku ngibun serta ngemata ke ulah siko-siko ari sida iya. Diatu nyau nambah siko agi uchu aku, bah apa lah daya! Udah nasib “badan”! Hai langgai! Senyum kediri aku.

Nunda ke jako P. Ramlee "Dunia, dunia".

Aram Kitai Sama Ninga Ke Jako Bansa Kitai

2007-02-09T14:50:00.000+08:00

Kepada Cikgu yang dihormati,

Harap maklumkan saya hari tidak dapat menghadirkan diri ini ke dalam kelas cikgu kerana saya mendapati saya dihinggapi penyakit.

Aku sudah betemu dengan deresa pagi ini tetapi sungguh menyedihkan aku disahkan tiada berpenyakit. Bapa saya telah membawa saya berjumpa manang, dan mengesahkan saya kena pansa utai.

Bersama dengan ini saya sertakan laporan manang berkenaan (Manang Nyawing), dan imbasan dari batu ilau manang berkenaan.

Minta tolong cikgu untuk menghebahkan perkara ini kepada guru besai dan cikgu disiplin.

p/s : kalau saya balik ke boding nanti saya bawakan buah nyekak dan buah sibau untuk cikgu.

Yang jauh dimata,

Anak muridmu.
Changking

Berekat ari Serga

2007-01-29T20:22:00.000+08:00

Lama aku udah enda nusoi berita ba ruai aku tu laban ke maioh pengawa ke enda tau enda di kerja aku dalam ruang bilik diri empu. Ujong taun 2006, aku nyambut penatai uchu aku ke baru, lalu iya ada puda (premature birth), iya nya kandung indai ya baru masuk genap 7 bulan. Uchu aku tu bisi adik kembar tang tudah iya nadai dalam kandung indai sida. Seduai iya ada ngena jalai beputong (Caesarean) lalu pemerat timbang seduai iya mina dalam kandang 1.5 kg.

Kami menyanak sinu amat ke seduai iya laban seduai iya enda ulih begulai serta mansang besai sama-sama. Tang kati ka enggau, Allah Taala lebih agi kasih ke semua anak mensia, nya alai kami menyanak nerima semua utai tu enggau ati beterima kasih lalu meri puji serta ngemesai ke nama Allah Taala.

Uchu aku ke biak tu diberi kami nama Trevor Kent Nyelipi (Nyelipi ngangkat ke nama niang apai aku). Adik Trevor diberi nama kristin Brooke Chamberlain lalu iya diberkat serta disembayang ka olih Paderi ari St. Columbus Anglican Church, Miri.

Tudah Trevor tu jampat mansang besai lalu pemerat iya bisi nginsor ngagai 3 kg saritu.

Kami menyanak sekali aku beterima kasih ke berkat serta pengasih Allah Taala laban ke udah ngibun kami enggau pengelantang, pengerai serta pengerindu selama tu. Kami besampi mega minta Allah Taala semampai ngintu kami enggau Roh Kudus iya dalam semua pengawa kami ka dikerja ka Iya. Dalam nama Jesus Kristus kami besampi ke peminta tu. Amen.

Nuju Bills enggau Tracy - Congratulations!

Nuju Baby Trevor Kent - Nenek semampai sayau selalu.

Nuju Baby Brooke Chamberlain - Nuan meh bintang ke nyadi penerang serta pengering semengat kami. Diau nyamai dalam rumah Tuhan, Apai kitai diserga.

Picture Source: Daily Cross

Ujan

2007-01-21T14:52:00.000+08:00

Gaga amat ati laban peda ari mua ari, ari deka ujan. Bisi ga tolong aku nyiram bungai serta nyelap ka bulu!

Selamat Taun Baru 2007

2007-01-09T11:15:00.000+08:00

Selamat Taun Baru nuju semua balai kitai sebilik. Arap ke kitai bulih berkat ari Allah Taala enggau pengelantang, pengerai enggau semua utai ke di ingin kitai selama tu.

Pulai Cuti-Cuti Malaysia

2006-12-04T12:16:00.000+08:00

Petronas Twin Towers, Kuala Lumpur City Centre

Saritu berasai lelak amat bekau ke udah pulai cuti ari Kuala Lumpur, Semenjung Malaysia. Kami mulai kediri ke Miri kena ari minggu tu tadi lalu datai enggai selamat. Pia mega leboh maia kami ke ba menua orang, nadai mega apa nama. Aku ngumbai uchu aku rawan nepan bilun, tang nasib meh tudah enda takut. Ngasoh iya jangkit2 merening bala anembiak ke duduk ngelingik iya. Meri puji ngagai Tuhan laban ke udah ngibun kami serta lalu ngemujur ke pejalai kami. Kami semina bejalai dalam kandang Kuala Lumpur aja lalu nadai nemuai ke Malacca enggau Negeri Sembilan. Leboh ke deka nyadang diri nemuai ke Malacca, menyadi aku ke biak ari aku agi deka bebeli ke barang guna diri. Iya madah ke barang menua nya jauh murah ari rega barang di menua Miri. Tambah mega, kena 1 enggau 2 December benong bisi "Jualan Murah", nya alai berabis bebeli ke perengka dapur, barang kena ngias rumah, Krismas decos enggau ayam main bala anak iya.

Kelimpah ari nya maioh mega alai kami raun, lalu utai ke bangat amat ngerindu ka uchu aku Nigel enggau Uncle Dexter iya ianya meda pemaioh ayam main, Genting Highlands, Aquaria Centre enggau Petronas Twin Towers, KLCC. Uchu aku madah kediri deka terbai ngagai tuchong PTT! Geli ati aku ninga jako iya! Amat abis pengaga iya di bai kami raun.

Pia mega menyadi aku ke dua iko tesat dalam PTT lalu nyau deka enggau orang tama kedalam opis! Enti seduai iya bisi mai "pass" tentu udah masuk lalu bulih kerja opis, ko kami duai menyadi aku ke tuai! Iya ke bendar, seduai iya tesat leboh pulai ari bilik jamban! Chali, ko uchu aku!

Aku nyadi tukang gambar kami lalu gambar ka paling maioh diambi aku iyanya gambar cara orang ngias kedai sida serta enggau ngias kayu Krismas. Laban ari Krismas nya deka datai, nya meh kebuah semua kedai-kedai ke bejanama serta besai dihias orang enggau naka iya pemanah. Ditu sekeda gambar ke di ambi leboh maia nya.

Cuti Cuti Malaysia

2006-11-22T09:18:00.000+08:00

Minggu tu aku kiroh bekemas ke barang ke deka dibai aku cuti dalam ujung minggu tu. Aku enggau uchu aku Nigel, menyadi aku dua iko serta anak iya ke biak, sama ngambi peluang nemuai ngagai menyadi kami ke diau di Shah Alam, Selangor.Ati gaga amat ngingat ka diri ka betemu enggau sida sebilik.

Tang kediatu aku bingong bekira ke nama barang ke deka dibai aku kena diri empu leboh ke di Semenanjung Malaysia tu ila.

Utai keterubah dikingat ke aku iya nya, ubat asthma Nigel. Kedua panggal kimbit iya, ayam kerita iya ke mit-mit lalu stroller kena kami duai raun din. Enda tan pan beberap ke iya, "he is heavy"!

Tudah Nigel kagit deka nepan bilun, laban ke suah enggai sida apai indai iya nganjong aku ngagai padang bilun enti leboh maia aku bisi bekerja ngagai menua bukai. Iya selalu angan-angan enggau aku, nya kebuah aku mai iya cuti lalu awak ke iya ngasai nepan bilun. Kami nyangka cuti dalam kandang seminggu aja, laban sida menyadi aku agi bisi bala anak ke besekula lalu sida iya deka besedia ke perengka sekula sebedau taun baru 2007.

Runding ipar aku ari Shah Alam, iya deka mai kami raun ngagai maioh tempat lalu tempat ka udah dikerunding ianya Genting Highlands, Malacca, Negeri Sembilan serta Sunway Lagoon, The Mine enggau siti utai ke enda tau enda dikerja ianya "Shopping"! Aku gaga amat enti ngenang pengawa "shopping" tu, laban tu siti pengawa ke dikerindu ke aku! Enda iboh bebeli ke barang tang "cuci mata"aja, cukup meh! Enti bisi jualan murah barang Christmas, nama kebuah enda meli dipelaba ke aku. :)

Aku arap ke kami menyadi mujur dalam bejalai cuti tu lalu besampi ke gerai serta lantang leboh ba menua orang. :) So, the turtles are going for a holiday! Happy happy day!

Happy Thanksgiving!

2006-11-20T13:00:00.000+08:00

Enda lama agi kitai deka nyambut "Thanksgiving Day". Bisi bala orang nyambut ari tu enggau begempuru kaban belayan lalu bisi mega ke semina nyambut enggau cara ngingat ke maia ari bulan nya aja.

Kami menyanak meri Selamat Hari Thanksgiving nuju bala raban ba ruai "Blogging" tu. Aram kitai sama-sama meri terima kasih lalu puji ke pengasih Allah Taala laban ke udah merkat kitai enggau pengerindu serta pengidup ke meruan serta lantang selama tu. Ngagai bala kitai ke bisi nyumai burung turkey, anang enda nyankong meh leboh maia makai! :)

Enti Puteri bisi mai ansa iya pulai ke Miri, udah ga aku minta bagi iya siko kena ke disumai nyambut Thanksgiving Day tu. Kati ko fikir nuan, Puteri? He..he..he..

Tangkir Gambar

Begau!

2006-10-17T09:32:00.000+08:00

Pagi tu bala kami ba opis begau laban bisi temuai datai ngagai opis lalu iya tu enda di adang datai. Sekumbang kami ke pindah ngagai opis tu dalam bulan tujuh tadi, maioh amat temuai datai lalu sida tu iya nya engkatak, ketam, ulat bulu, kelebumbu tauka kelebembang, kesulai, lalu ke saritu iya nya ular!

Kami nemu ular tu bisi leboh maia penolong opis benong nyiram serta muai daun mati bungai ke bisi di tanam kami dalam pasu.

Ko iya, ngelama tu nadai iya tepeda ke ular nya. Nya alai pikir kami maioh ular tu datai demalam lalu rindu ke opis kami tu. Engka nya nyamai meh diau dalam rumah ari diau di luar din. Nyadi opis kami rumah ke dikumbai orang gaya "G10" lalu di ubah nyadi opis gaya rumah panjai. Iya semak enggau babas, engka nya kebuah sida jelu enggau indu utai ulih datai kedalam iya.

Laban leboh kami terubah datai ditu balat amat serbana ke opis tu enda nyamai alai kerja, dia deh bala sida tuan-tuan besai kami ngaga opis kami tu baka gaya rumah kitai empu. Kami bisi sip dapur, microwave oven, peti ais, kerusi sofa (manah amat sofa tu) lalu bilik dihias cara “interior design”.

Pia mega laban ke jauh ari opis besai, kami di sedia ke payung lalu enda lama agi deka di beli ke basikal kena kami kin. Kami pan di asuh meli kasut ke mar serta nyamai dikena bejalai (berega enda lebih ari RM600). Anang tekenyit bala kita meda rega kasut kami RM600. Umor aku enda kala meli kasut tinggi ari RM250. Dini meh deka meli kasut rega RM600 di menua Miri tu? Nganti raun ngagai menua bukai meh baru ngiga lalu meli iya, enti bisi!

Bakanya meh cerita aku ke diatu. Enti aku bisi maia lepa, aku ngambi gambar gaya opis kami ditu. Mupok aku.

ShoutBox

2006-10-11T12:00:00.000+08:00

Lemai tu aku gaga amat laban ke mujur naroh "shoutbox" ba ruai aku. Lama bendar aku udah nguji nangkir iya, lalu baru saritu meh mujur. Aku pan lalu nemu mansi pemesai "shoutbox" nya. Wah! Berasai pandai serta pintar aku ba pengawa tu. Muji diri laban ke selalu salah ngadu pengawa tu ngelamatu! Ukai nama aku lubah nangkap reti jako cara-cara nangkir iya, untak dah tuai nya kebuah lubah mereti ke jako ke di tulis orang dia. Hai langgai! Nya meh gaya bala sekeda kami ke nyau tuai tu, lansang amat! Mamau enda ga tang tak lansang!

Bah, enti bisi bala kita deka becerita enggau aku, tau ninggal ka jako pesan dia. Dia aku ulih, aku malas iya. :) Mupok aku.

Penyakit Asthma

2006-09-22T09:44:00.000+08:00

Lama amat aku udah nadai ngabas ruai aku tu laban ke maioh bendar utai ke ngasoh aku bangat kiroh. Utai deka di tusoi enggau bala pangan maioh tang nya meh, tak suntok jam nama aku deka berengkah nulis iya ditu.

Siti utai ke amat amat ngasoh aku kiroh serta mai asai penyinu ia nya beribun ke Nigel enti leboh maia iya datai ampus (bronchial asthma). Penyakit tu bisi ga di kumbai kitai Iban penyakit bengih (bronchitis/pneumonia). Nama maia ari ujan tauka kelalu celap, dia ampus iya deka datai. Bulan lapan enggau pun bulan sembilan tu tadi diserak enggau jerebu, lalu nyadi meh ampus iya nya.

Enti leboh ari ujan berasai nyamai amat bak aku laban chelap, tang ba orang ke enggai chelap lain ga kini.

Nya meh, nama Nigel tu sakit balat amat meh iya meraya lalu deka amat nyabak. Sampai ke temutah-mutah iya! Ma pagi ari sida indai iya deka turun kerja, dia iya lalu berulah enggai di anjung ke Tudan. Enggai di ibun inik iya ke diau din. Lalu carut meh kami menyanak ngatur iya tu! Kadang kadang enggai tama kedalam kerita, tumpu iya enggau kaki sampai pemek pintu kerita kancil indai iya. Panas meh orang deh! Cakap pun tak guna, ko jako sekeda orang. Endang ke pegawa kami menyanak meh maia pagi ari deka nurun kerja. Seruran chapuh kami muchu! Bala sida bilik apai-indai Puteri suah meda ulah kami menyanak ke begau maia pagi ari.

Taja pan pia, suah ga aku geli ati ngenang ulah bala kami menyanak. Agi suba aku madah ke diri empu enggai beribun nama bala anak aku udah niri ke rumah tangga. Ukai nama jako nya, laban ke ngasai ke diri agik ka ngiga insur, ka nyadi dara glamor lah tek konon! Nya, kediatu aku tu ga ke gagit agi ke beribun ke sida uchu aku, laban ati aku rindu amat meda gaya ulah seduai menyadi.

Tudah Nigel nyau ga mansang besai lalu iya nemu ngibun diri empu enti leboh maia iya kena ampus. Iya nemu masang "inhaler" kedalam "spacer" ke diguna kena sida ke agi mit. Ba penemu ati nembiak, "air chamber" tu baka ayam kena bemain. Bisi sekali aku ilap, dia iya manchit lebih ari tiga kali "dose" air-inhaler nya! Apooo! Panic aku! Nasib aku jambat ngerampas air chamber nya ari iya sebedau iya nyintak ubat nya! Enti enda abis luput meh tudah uchu aku. Aku pan tentu kena "bombard" bala anak meh lalu di kumbai orang lalek! Kadang kadang setuju ga aku enggau jako sida iya tang bisi ga maia aku ngelaban. "Eh, kita bedau ngasai iya, nya alai kita jako nya," ko aku.

Bah, naka tu meh cerita ulih aku tusoi kediatu. Ila kitai betemu baru. Selamat dalam semua pengawa ngagai bala raban kitai ke bisi ngetu bak ruai aku tu.

Bejalai segulai enggau bala raban Iban

2006-08-16T10:55:00.000+08:00

Ngagai bala pangan ka udah enggau aku bekelala serta bisi lalu ngetu ba ruai aku ka diberi aku nama "limpyfrogsmusings.blogspot.com" suba, kita tentu meda bisi berubah mimit ruai aku. Nyadi ruai aku ka baru tu diberi aku nama "limpyfrogmusings.blogspot.com". Ruai tu digaga aku baru laban iya keh lama suba lenyau! Enda nemu nama utai salah ditekan aku leboh ke nyimpan berita baru. Nguji ngiga ruai lama aku nya tang enda temu....hmm....lesap meh iya kini ditiup angin taupan! Nya meh kebuah aku ngaga ruai ka baru tu. Enti bala bisi deka nangkir baru ba ruai aku tu, tangkir ka meh! Go ahead ko jako orang ribai. Minta ampun ngagai ELG, JB63, GR, Mag enggau Puteri laban jako peransang (comment) kita lenyau magang. Sayau amat aku ka leka jako ari kita semua, tang kati ko enggau. Nya meh, enti menua kami duai Puteri semak, udah ga aku ngagai iya minta tolong. Bangat lansang endar ga aku ba pengawa dunya IT tu. Taja pua ingat ga aku ka jako Puteri ka selalu meri jako peransang "don't give up", "keep trying", "anang enggai belajar", etc, etc. Amat enda bula jako ajar bala sida ka "cikgu", semampai ngasoh bala maioh belajar. Terima kasih Puteri laban endang amat jako nuan nya.

Ba baroh ditu aku nandu jako aku ka dikena aku ngepun ruai aku ke dulu suba.

Keterubah aku mungkal "blog" tu, aku nulis ya dalam jako orang ribai (english). Tang udah aku meda maioh endar bala kitai Iban bisi tansang kediri empu, aku pan lalu deka mega nguji ngaga siti tansang ke baka enggi sida. Nya meh kebuah "LimpyFrog's Musings" tu aku ubah lalu dikena aku nulis serta nusui berita dalam jako Iban.Kena aku ngelalu ke kitai maioh, aku meri tabi serta basa ke penatai kita ke ditu.Nyadi aku enda tentu nemu nusun leka jako kitai iban enggau likun tang di pelaba ke aku, enti kepuas aku nguji enda patut enda ulih. Beteladan ke gaya serta cara kitai iban ke bukai meh aku nulis ditu ila. Arap ke kita anang ringat enti bisi utai ke ditulis aku ditu ila enda tak manah dedinga, tang aku meri terima kasih enti kita enggau ati rindu meri jako lalau ngagai aku.Naka tu dulu jako aku. Ila aku nampong ya enggau cerita bukai mega.Aku arap ke kitai semua bulih berkat serta pengasih ari Allah Taala selalu. Mupok aku. :)